相信大家都去过天河城行街购物，呢到客流量有几高？有一年既元旦客流记录系80万！响呢个广州人熟悉商业广场，有好多不为人知既事情。以下系我所知既事实之全部。今日讲出来比大家知：

（一）天河城不可解析既死人事件。

天河城开业以来一共死左4个人。

1.响装修期间，有个装修师父响中庭（天河城中间，类似天井，可以望到吉之岛果个位置）所搭既临时棚架上，失足跌落B1吉之岛。奇怪既系，个装修师父当时系帮左安全带，安全带将距个身同埋棚架扣埋一齐。距跌落去果阵安全带仲扣住个棚架，个扣无松开。事后公报话个装修师父自己除左安全带,失足出事。点解个装修师父要戴安全带上去，又除左呢？除左可能系为贪方便，但贪方便做乜要将个扣重新扣埋呢？都唔合逻辑，但答案无人知～～

２.响98年，有个男人怀疑响天贸南大洗假银纸，当收银员对距所比既银纸检查时，果个男人可能做贼心虚跑左出去。当时商场保安即刻通知大门保安拦截。结果果个人系撞玻璃冲出去。（天河城正门既玻璃系响日本订做，高十几米，厚30厘，成十几万$。）玻璃比果个男人撞左个人形大窿，果个男人一直跑到出边人行道终于支持唔住训低左～～当时留低一条50几米既血迹。去过天河城既朋友都知道，天河城个正门有大细4个门。一个保安点拦住甘大个门？而且其他玻璃上都明显贴左防撞条。有门唔行，撞玻璃！仲有，块玻璃系钢化玻璃一烂就应该全部碎晒，点解会留个人形响度？除非果个人当时既速度快过子弹啦！有甘快边有人拦得住啊！仲使咩撞玻璃啵！真系好古怪～～

3.天河城开业最初系由武警驻守既。每晚每个楼层都有一个武警值班。有一个武警死左响宜家天河城东南塔4楼。尸体系第日发现，个武警死状好似训觉甘。相信当时个武警响度训觉，到死果阵都未知咩事～～验尸报告讲尸体无病理死亡迹象，尸体左脚脚趾公有两点直径0.5毫米血孔，系被不明物体刺穿。死因不明～～唔通天河城有蛇？但比蛇咬死应该有症状可寻架！点解查唔出来呢？唔通系僵尸！无人解析得到～～

4.响天河城4楼北面，以前有个溜冰场。99年夏季，有个16岁女仔，同朋友一齐踩lou期间，突然撞向墙边不醒人事。事后送院不治死亡～～据验尸报告称死者死于突发心脏病。据当时记录所得，个女仔系自己一个踩紧，身边无人。点解会突然撞埋墙？仲有据个女仔家人讲，个女仔从来都未发现有心脏病，屋企人都无心脏病史。点解个女仔死于心脏病呢？就算撞埋墙，都唔应该引起心脏病发架！去过果度踩lou既人都知道，为左防止意外，果度D墙系全部铺晒软垫。除非速度好快，米应该唔会撞到死人甘大件事！真系唔知点解析～～

（二）天河城既白影之谜。
1.2000年夏季既一个夜晚3点几，有一个PA（清洁员工）向当晚值班既管理员报告，向4楼北面（上文提到既溜冰场当时已经结业退场，并用木板封闭，至今都一直未开放）见到一白色人形物体出现。管理员将情况立即向总值经理报告，总值经理安排10名保安、两名管理员进入该未开放区域查明原因。经过1个多小时查找，未有发现任何可疑事物。为进一步查明原因，总值经理要求保安部查看当时既监控录像。录像记录系3：08时，举报事件既PA响4楼北面打紧蜡，突然个PA好似被咩野吸引住，向未开放区域呆呆甘望左成分几钟，之后就掟低晒手到D工具跑走左。但整个过程镜头就得果个PA，其他咩都睇唔到。事后当晚既总值经理将事件详细记录于交接班部内，向老总汇报。而当事人（即系果个PA）第二日开始就一直请病假，后尾被天河城炒左～～

2.响天河城六楼美食坊，东北面有条十几米既通道。通道里面有一个洗碗间、一个仓库、一条唔开既货梯，系一条掘头路。有个夜晚（sorry唔记得左几时）01：30时，两个保安巡更（天河城既保安夜班00：30时开始巡更,每层都有一个保安留守。）到左呢到，同时见到一个白影好快甘入左呢条通道，当时通道系无开灯既。两个保安迅速打开通道灯，行入去检查，通道里面咩野都无，检查所有房门都系上晒锁既～～

3.2001年春季，一个夜晚2：00时。两个夜班管理员，去五楼西北塔签到（五楼西北塔有一本巡更签到表。进入塔楼既通道系一条3米几阔，二十几米长既通道，两边全部系落地玻璃）。两人同时见到一个白影从通道掠过，白影返照响两边玻璃到，化成几十个白影（玻璃里面都系买古董家私既，晚黑收工都熄晒灯。因为甘外面光，里面黑，形成左镜面）。两个人比当时既情景吓到呆左，跟住就飞甘脚跑左去。事后两个人分别同我讲起呢件事，都讲清楚见到个白影系个人形，有头发，同埋隐约见到五官～～

其实天河城仲有好多无法解析既事，但不能尽录。多谢大家耐心睇完呢篇野!大家会问，点解我会甘清楚知道呢D事。其实我系响天河城做物业管理既，以上都系我响度做左3年时间里面所听所闻